„Курирање на современото: Нематеријалности“ е насловот на предавањето на Рик Долфијн кое денеска во 12.30 часот ќе се одржи во Музејот на современата уметност во Скопје. Фокус на предавањето е револуционерната изложба „Нематеријалности“ (Les Immatériaux) ко-курирана од филозофот Жан Франсоа Лиотар во 1985 година, и начинот на кој кураторот преку оваа изложба искажува грижа за светот и современоста.
– Воведувајќи „изложба која промислува“, која замислува свет што доаѓа и за кој се презема одговорност, се овозможува пристап преку кој оваа изложба, но и изложбите воопшто можат да го истражуваат својот политички потенцијал денес – велат од МСУ.
Долфијн е професор по медиуми и студии на културата на Универзитетот во Утрехт. Неговите публикации се однесуваат на континенталната филозофија и современата уметност како резултат на истражувачките интереси во доменот на постхуманизмот, новиот материјализам, материјалната култура и екологијата. Тој е почесен професор на Универзитетот во Хонг Конг и визитинг професор на Универзитетот во Барселона. Неговите публикации ги вклучуваат насловите Foodscapes (Eburon/University of Chicago Press 2004), New Materialism: Interviews and Cartographies (Open Humanities Press 2012, издадено со Ирис Ван Дер Туин). Неговите статии се публикувани од списанија како Continental Philosophy Review, Angelaki, Rhizomes, Collapse и Deleuze Studies.
